Nagpakigsapol si Dumarao, Capiz Mayor Mateo Hachuela kay Governor. Fredenil Castro kag iban pa nga mga opisyal may kaangtanan sa Local Government Support Fund nga ginahatag sang Department of the Interior and Local Government (DILG).
Sa interview sang Bombo Radyo kay Mayor Hachuela, iya ginpahayag nga gin-download na ang pondo nga nagabalor sang ₱10 milyon para gamiton sa nagkalain-lain nga proyekto sa mga kabarangayan sang banwa.
Lakip sa nakabaton sang pondo amo ang Barangay Lawa-an, Nagsulang, Astorga kag Sibariwan nga may tig-₱2.5 milyon para sa ila tagsa ka proyekto.
Suno kay Hachuela, ang DILG ang nagapili sang mga barangay nga pagahatagan sang pondo base sa ila kinahanglanon agud mahapos ang pagproseso kag pagpatuman sang mga proyekto.
Ginsiguro man sang alkalde nga nagasunod sa nagakaigo nga standard ang implementasyon sang mga proyekto bangod ang naga-supervise nga engineer ang gikan man sa DILG.
Ginpasalamatan ni Mayor Hachuela ang national government sa padayon nga suporta kag bulig para sa kauswagan sang banwa sang Dumarao.
