Nagpasaka sang kaso nga cyber libel si Dumarao, Capiz Mayor Mateo Hachuela sa Provincial Prosecutor’s Office batok sa isa ka Facebook account bangud sa ginaalegar nga pagpakamalaot sa iya kag sa iya pamilya.
Sa interview sang Bombo Radyo kay Mayor Hachuela, iya ginpahayag nga ginabaton niya ang mga kritisismo bangud kabahin ini sang iya trabaho bilang opisyal sang gobyerno.
Apang ginpahayag sini nga lain na ang personal nga pag-atake, ilabi na kon nadalahig na ang iya pamilya kag wala sang basehan ang mga ginapalapta nga pahayag.
Dugang pa ni Hachuela, paagi sa iya pagpasaka sang kaso, napakita ini nga ang mga ginahimo nga pag-atake paagi sa social media mahimo magresulta sa legal nga responsibilidad kon may paglapas sa kasuguan.
Samtang, bukas man ang talatapan sang Bombo Radyo sa pagpaathag sang tawo sa likod sang Facebook account nga ginpasakaan sang kaso.
