DUMARAO, CAPIZ- Ginpatpat sang hepe sang Dumarao Municipal Police Station ang mga accomplishments sang ila nga talatapan sa banwa sand Dumarao, Capiz halin Enero tubtob Hunyo.
Sa interview sang Bombo Radyo kay Police Major Tobias Garfin, Hepe sang Dumarao Municipal Police Station, iya ginpahayag nga sa malawig nga kampanya kampanya kontra sa ilegal nga armas kag droga, ginapabugal niya nga nangin madinalag-on ukon positibo ang resulta sang operasyon sang mga kapulisan sa banwa.
Dugang pa sini, kada bulan, ang Dumarao PNP naga-kumpiskar sang isa ukon duha ka mga armas luthang, kag nakapangdakop sang mga wanted persons sa mga operasyon.
Ginsiling man sini nga ang pagmintinar sang kalinong sa banwa indi lamang responsibilidad sang kapulisan kundi sang tanan.
Sa pihak nga bahin, isa sa mga nagapanguna nga accomplishments sang Dumarao PNP sa idalom sang pagdumala ni Garfin amo ang pagdakop sa mga miyembro sang Communist Terrorist Group (CTG). Naka-aresto sila sang 1 ka Communist Terrorist Group (CTG) member, kag may 5 ka mga miyembro sang Communist Terrorist Group (CTG) nga nag-boluntaryo nga nagsurender sa mga otoridad.
Ginpahayag man ni Garfin nga ang mga armas luthang nga nakumpiskar sa operasyon gina-transfer sa provincial headquarters agud nga ma-dispose.
Sa kabug-usan, lima ka mga armas ang nakumpiskar sa mga operasyon, samtang wala sang explosives ang narecover. Samtang, ginapangabay ni Garfin ang kooperasyon sang tanan nga sektor sa pagpabakod sang mga programa kontra sa kriminalidad kag pag-amlig sang kahilwayan sang banwa.
Interviewed by Bombo Francis Biñas and Bombo Sunnie Mae Batencila
