ROXAS CITY – Padayon nga ginatumod sang mga kapulisan sang Dumarao Municipal Police Station ang suspek nga responsable sa shooting incident nga natabo sa Barangay Tina, Dumarao, Capiz.
Sa interview sang Bombo Radyo kay Police Lt. Bonifacio Galvez sang Dumarao PNP nga may yara na sila sang ginasundan nga lead agud matumod ang identity sang suspek nga nagluthang patay kay Noel Sarceno, 34-anyos kag residente man sang nasambit nga lugar.
Suno kay Galvez nga may yara sang ginapangatubang nga kaso si Sarceno matapos nga nakapatay man ini anay sang duha ka mga persona nga isa man sa ginalantaw sang mga kapulisan nga motibo sang suspek sa pagpatay sa biktima.
Matandaan nga sandig sa imbestigasyon sang Dumarao Municipal Police Station nga yara sa idalom sang impluwensya sang makahulubog nga ilimnon ang biktima sang nagpadulong ini sa bilasyunan sang iya pakaduha kun sa diin gintayaan kag luthangon sini kuntani ang duha ka mga persona nga sanday Nestor Venecio kag Razel Acejo.
Nahibaluan nga ikaduha ka beses pa sini ginpitik ang gatilyo sang armas luthang apang wala man ini naglupok.
Gilayon naman nga nagdalagan kag naghalin ang biktima sa lugar sang hinali na lamang ini nga ginluthang sang wala matumod nga persona.
Bangud diri, nag-angkon sang pila ka mga igo sang armas luthang ang pila ka mga parte sang lawas sang biktima nga gilayon naman gindala sa Sara District Hospital, Sara Iloilo apang gindeklarar ini nga dead on arrival sang attending physician nga si Dr. Analysa Zeller.
Narekober naman sa lugar ang isa ka homemade 12 gauge shotgun (break type) kag isa ka bala, 5 ka catridges sang ginapatihan nga caliber .45 kag duha ka deformed slug sang wala matumod nga caliber sang armas luthang.
Sa karon, nagapadayon ang imbestigasyon sang mga kapulisan sa nagluntad nga insidente.
