ROXAS CITY – Ginpakigbahin sang duha ka mga pamatan-on ang kadungganan nga ila nabaton sa ginhiwat nga Dungog Lunhaw: Search for the Most Outstanding Environment Initiatives 2021 sang Capiz Environment and Natural Resources Office (CaPENRO).
Ginkilala bilang Coastal Management Initiatives ang 4H Club sang Pilar sa pagpamuno ni Mr. Aldren Fuentes, samtang Outstanding Eco-Youth Volunteer naman ang ila vice president nga si Mr. Jyp Carlo Catunao.
Sa interview sang Bombo Radyo sanday Fuentes kag Catunao, suno sa mga ini nga wala nila ginalauman ang amu nga pasidungog.
Nahibaluan nga indi lamang bangud sa pasidungog ang rason sa pagpasakup sang nasambit nga mga pamatan-on sa amu nga kahiwatan, kundi agud makahatag man sang pagbag-o sa palibot pinaagi sa pagpaambit sang ila adbokasiya sa iban pa nga mga kabataan agud halongan ang palibot.
Ang Dungog Lunhaw ang isa ka aktibidad kun sa diin nagapresentar ang tagsa ka partispante sang ila nagkalain-lain nga pamaagi nga may dako nga bulig sa aton Dunang Manggad.
