Gin-athag sang Duterte Youth party-list sang Biyernes nga ang paggamit sang lain nga apelyido para sa ila una nga nominado nga si Drixie Mae Suarez-Cardema, para sa “name recall” ukon mahapos nga pagkilala sang ngalan sa pulitika.
Suno kay Ronald Cardema, chairperson sang Duterte Youth kag bana sang anay tiglawas nga si Ducielle Marie Suarez-Cardema, utod ni Drixie nga si Ducielle, kinaandan na para sa mga mamalidha nga maggamit sang ngalan sa politika sa pagsugod sang Kongreso.
Ang party-list ginbatikos sa social media pagkatapos nga natalupangdan nga ang apelyido ni Drixie tuhay sa iya Certificate of Nomination (CONA), sa diin gingamit niya ang apelyido nga “Cardema” sa baylo sang iya matuod nga apelyido nga “Suarez.”
Ginpahayag ni Commission on Election (Comelec) Chairman George Garcia nga magapagwa sang show cause order ang iya Law Department agud imbestigahan ang paggamit sang lain nga apelyido, apang iya ginklaro nga wala ini nagakahulugan nga may yara sang kaso sang disqualification ukon election offense.
Dugang pa ni Garcia, tan-awon sang Comelec ang mga dokumento nga ginsumiter ni Drixie para sa 2025 midterm elections, subong man ang iya nauna nga records.
Matandaan nga nagpangaduha ang Duterte Youth sa party-list race sa 2025 Elections matapos makakuha sang 2.3 milyones ka boto. Apang ginpaisol sang Comelec ang ila pormal nga proklamasyon bangud sa mga pending nga isyu.
