ROXAS CITY – Natigayon na nga madakpan sang mga kapulisan ang duwa ka suspetsado sa pagpanghold-up nga nagluntad sa syudad sang Roxas.
Ini ang ginpahayag ni PLtCol. Aron Palomo, hepe sa Roxas City PNP sang ma-interview sang Bombo Radyo.
Suno kay Palomo, lunsay mga menor de edad ang suspetsado sa pagpanghold-up nga natabo sa Magallanes street kag Legaspi Street, Roxas City takna alas 4:00 sang kaaganhon sadtong nakaligad nga mga inadlaw.
Ginpahayag sang hepe nga ginmanduan niya ang iya mga tinawo nga maghiwat sang night patrolling sa dis-oras sang kagab-ihon kun sa diin natigayon nga madakpan ang duwa ka menor de edad nga mga suspetsado nga yara sa bahin sang Brgy. Banica sining syudad nga nagaplano naman nga magpangawat sa isa ka balay.
Apang, natiktikan ini sang mga kapulisan kag sila ang ginpangdakop.
Base sa imbestigasyon sang Roxas City PNP, ang duwa ka menor de edad ang suspetsado man sa pagpangawat sang kwarta nga nagabalor sang P12,000 sa isa ka establisyemento sa bahin sang San Roque Extension Street, Roxas City agud i-down sa ginbakal nila nga motorsiklo nga ila ginagamit sa ila operasyon.
Ang kaso sang duwa ka menor de edad ang ginpasa na sang mga kapulisan sa Municipal Social Welfare and Development Office (MSWDO) para mahimuan sang case study agud mapasakaan sang nagakaigo nga panumbungon.
Padayon pa sa gihapon ang pag-imbestigar sang mga kapulisan sa pamilya sang mga suspetsado nga posible madalahig nga mapasakaan sang kaso ang iloy kag amay sang mga ini nga nagakonsente kag nagaganar man sa iligal nga buluhaton sang ila mga anak.
Nagalaom si Palomo nga indi na maliwat ang kasubong sini nga hitabo kag nagapangabay man ini sa mga ginikanan nga ubayan sang insakto ang ila mga kabataan agud indi maghimo sang malain nga buluhaton kag nagpangabay man ini sa mga pumuluyo nga likawan nga maglakat sa dis-oras sang kagab-ihon ilabi sa mga madulom nga lugar agud indi mabiktima sang pagpanghold-up ukon iban pa nga sahi sang kriminalidad.
