SIGMA, CAPIZ – Nagapabilin sa kustodiya sang mga otoridad kag natalana nga pasakaan sang nagakaigo nga panumbungon ang duha ka kawatan sang manok nga nadakpan sang mga pumuluyo sang Brgy. Pagbunitan, Sigma, Capiz.
Matandaan nga ginkilala ang mga nagkaladakpan nga sanday alyas Jesrel, 24-anyos residente sang Barangay San Rafael, Dumalag kag kaupod sini nga si alyas Kipat, 37-anyos nga residente naman sang Barangay Tanque, Roxas City.
Sa interview sang Bombo Radyo kay Punong Barangay Adan Villasis sang Brgy. Pagbunitan, ginpahayag sini nga nadakpan ang nasambit nga mga kawatan pinaagi sa pagbuligay lagas sang mga Barangay Tanod kag mga pumuluyo sang tinalikdan nga adlaw Hulyo 31.
Suno kay PB Villasis, madamo na nga na-report sa ila nga nagkaladula indi lang manok kundi iban pa nga pagkabutang kaangay sang motor.
Dugang pa sini nga ginalantaw man nila nga posible ang mga nagkaladakpan amo man ang suspek sa nagakatabo nga kinawatay sa ila lugar kag sa kalapit nila nga barangay.
Samtang, gin-ako naman ni alyas Kipat sa ila nga madamo na ini sang hinimuan nga pagpangawat.
Nagapabilin sa karon ang nasambit nga mga kawatan sa kustodiya sang Sigma PNP para sa nagakaigo nga disposisyon.
