Isa ka tikang ang early detection agud nga malikawan ang malala nga epekto sang cervical cancer sa kababainhan.
Sa interview sang Bombo Radyo kay Dr. Joannah Uy-Parreño, Obstetrics kag gynecologist sang Bailan District Hospital, iya ginpahayag nga ang cervical cancer isa ka seryoso nga sakit sa cervix sang isa ka babayi kag isa sa pinaka-common nga klase sang cancer sa mga babayi sa Pilipinas.
Ginakabig ini nga tuman ka delikado bangud wala ini sang mabatyagan nga sintomas sa una nga stage, rason nga madamo ang ulihi na antes nga ma-diagnose.
Suno kay Parreño, sandig sa mga health authorities, nilibo nga kaso sang cervical cancer ang nabalhag sa pungsod kada tuig.
Sa sini nga rason, ginaselebrar ang Cervical Cancer Awareness Month agud mapataas ang ihibalo sang publiko parte sa sakit, ilabi na ang importansya sang regular nga screening kag bakuna batok sa Human Papillomavirus ukon HPV— ang nagapanguna nga rason sang nasambit nga cancer.
Dugang pa sang natungdan, mahimo nga temprano nga malikawan ang nasambit nga balatian paagi sa bakuna, regular nga screening, kag husto nga pag-amlig sa ikaayong lawas .
