Gindeklarar sang World Health Organization (WHO) ang Ebola outbreak sa Democratic Republic of the Congo bilang isa ka public health emergency of international concern bangud sa posibilidad sini nga maglapta sa iban nga pungsod.
Suno sa WHO, ang outbreak yara sa nasidlangan nga bahin sang nasambit nga pungsod nga may yara na sang 246 ka suspected cases kag 80 ka napatay.
May yara man sang 8 ka kumpirmado nga kaso, ang isa sa kapital nga Kinshasa kag iban pa sa pila ka health zones.
Ginkumpirmar nga ang virus nagikan sa Bundibugyo strain sang Ebola nga wala pa sang aprubado nga bakuna ukon bulong.
Ang sintomas sini amo ang hilanat, pagpalanakit sang lawas, grabe nga pagkapoy, pagsuka diarrhea, kag pagdugo nga amo ang malala nga kaso.
May report man sang kaso sa kalapit nga Uganda, ang isa ka 59-anyos nga lalaki nga napatay matapos matapnan sang virus.
Nagpaandam ang WHO nga mahimo pa maglala ang sitwasyon bangud sa kahimtangan sang rehiyon kag kakulangan sang health services, kag ginapahanumdom ang mga apektado nga pungsod nga magpatindog sang emergency response, hugot nga monitoring, kag isolation sang mga pasyente.
