Nangin inspirasyon sa madamo si Diosdado “Tatay Ebang” Evangelista, isa ka mangunguma halin sa Candoni, Negros Occidental, matapos siya makapasar sa Agriculturist Licensure Examination sa edad nga 72.
Sa interview sang Bombo Radyo kay Tatay Ebang, iya ginpahayag nga ginpangabudlayan niya ang pag-uma sang bugas, tubo, cacao kag luy-a sa sulod sang madamo nga tuig agud masuportahan ang pag-eskwela sang iya apat ka kabataan tubtob nga makatapos sang kolehiyo.
Matapos makagradwar ang iya mga kabataan, nagdesisyon siya nga balikan ang iya kaugalingon nga pangandoy kag nag-enroll sa Central Philippines State University-Candoni Campus sa BS Agribusiness sang 2018.
Natapos niya ang kurso sang 2023 kag bisan napaslawan sa una nga board exam, wala siya nadulaan sang paglaum.
Suno kay Tatay Ebang, wala sang edad sa pagtuman sang handum basta may determinasyon kag pagpaninguha. Ang iya pagpasar sa board exam sang 2025 isa ka pamatuod nga ang edukasyonmahimo maangkon bisan sa ano nga edad.
