Magapabilin nga buhi ang kahulugan kag mensahe sang EDSA People Power.
Ini ang ginpahayag ni Senator Risa Hontiveros sa pihak sang indi pagdeklarar sang gobyerno sang opisyal nga holiday sa tunga sang pagdumdom sang ika-39 nga anibersaryo sang EDSA People Power Revolution.
Suno kay Hontiveros, ginkalipay kag nagdayaw ini sang makita ang mga estudyante, mga manunudlo, mga buluthuan, mga unibersidad kag youth organizations ang nagpanguna sa anibersaryo sang EDSA People Power.
Pila sa mga universities sa pungsod ang nag-inisyatibo nga i-suspend ang klase agud hatagan ligwa ang pagdumdom sa EDSA People Power Revolution.
Ginganyat sang senadora ang publiko nga sundon ang kaisog sang mga kabataan, indi magkahadlok nga ipahayag ang kamatuoran kag tapnaon ang disinformation kag historical distortion kag padayon nga batuan ang anomalya, kapintas kag kasakon sa gahom.
Samtang, ginpahayag naman ni Senate Minority Leader Koko Pimentel nga dapat lang saulugon kag handurawon ang EDSA People Power bangud kabahin na ini sang kasaysayan sang Pilipinas.
Dugang ni Pimentel, ini ang dapat nga ipabugal bangud ang amu rebolusyon isa ka panindugan, ginpakigbato kag handa ang mga Pilipino nga magbuwis sang kabuhi para iduso ang demokrasya, good governance kag people empowerment.
