ROXAS CITY – Nahatag na sa mga existing verified scholars sang provincial government ang ila nga educational assistance para sadtong S.Y. 2021-2022 sa second semester.
Ini ang ginkumpirmar ni board member Thea Faith Reyes, chairman sang Committee on Education, sang Sangguniang Panlalawigan, sang mainterview sang Bombo Radyo.
Suno diri, ini ang pagtuman sa nangin mandu sang Gobernador nga bayaran ang educational assistance sang mga scholars sang nagligad nga school Year, nga naka-enroll sa first semester kag second semester.
Gani, sa bahin sang Merit Private Scholars, gindiretso sang gobyerno sa pribado nga eskwelahan ang pagbayad sang P5,000 nga educational assistance sa 478 ka mga estudyante, pinaagi sa cheke.
Samtang, P10,000 nga cash naman ang ginbaton sang 41 ka mga estudyante sa idalom sang special courses, kag P1,000 sang Educational Financial Assistance sa 649 ka mga estudyante sa ila second semester.
Pagklaro ni Reyes, nga ini sila nga mga iskolar sang nagligad nga School Year ang ginba-se ang listahan sa ila tagsa-tagsa nga accounting office, vouchers nga ginbayaran sang probinsya, nga maid-id nga ginberipika sang ila talatapan, rason nga na-delay ang pagpahatag sang ila educational assistance, matapos nga wala sang may ginbilin nga listahan ang nagligad nga tagdumala sang scholarship nga si Rovil Villasoto sang Contreras administration.
Gindugang man ni Reyes nga magluwas sa panibag-o nga target sang administrasyon ni Castro nga 4,500 ka mga iskolar ang pagakuhaon, may yara pa sang 408 ka mga old retained kag verified scholars ang gobyerno probinsyal.
