Ang Eid al Adha ukon Feast of Sacrifice ang ikaduha sa pinakadaku nga holiday nga ginasaulog sang mga Islam bilang pagkilala sa kabubut-on ni Abraham nga isakripisyo ang iya isa ka bata bilang parte sa pagsunod sini sa mandu sang Ginoo.
Sa interview sang Bombo Radyo kay Bombo International Correspondent Mechille Ann Deocampo Duronio, direkta sa Dubai, United Arab Emirates, ginsiling sini nga sa pungsod United Arab Emirates (UAE), ang Eid al Adha ang ginaselebrar sa sulod sang 2 tubtob 4 ka adlaw kun sa diin ang adlaw nga ginatawag nga Day of Arafat ang ginakabig pinakabalaan nga adlaw sa mga Muslim.
Dugang pa sini, ang mga Muslim ang nagatililipon sa mosque kag open spaces antes ang pagbutlak sang adlaw agud magpatigayon sang morning prayer nga nagadugay sa masobra 1 ka oras.
Matapos ang amo nga morning prayer, ginasundan ini sang sermon sang Imam ukon preacher kun sa diin nasentro ang mensahe sini sa importansya sang pag-updanay sang pamilya kag nagadala sang kalipay sa kabuhi sang tagsa-tagsa.
Pahayag pa ni Duronio, pagkatapos sang pagtamyawanay, diri na magasulod ang pagpatay sang mga sapat kaangay sang karnero, camel, baka ukon kanding para sa offer of sacrifice.
Samtang, ang pagpatay sa amo nga mga kasapatan ang magaserbe nga handa nag pagtililipunan sang bug-os nga pamilya kag agud nga ipakigbahin man sa ila sini isig ka-tawo.
Nahibaluan nga ang selebrasyon sang Eid al Adha, ang naka sentro man sa charity ukon ang pagpakigbahin sang grasya sang mga maawag-awag para sa mga pigado nila nga mga kauturan.
Gintuad pagid ni Duronio nga ang selebrasyon sang Eid al Adha ang kaangay pagsaulog sang Paskwa sa Pilipinas, kun sa diin ang magpamilya ang nagatililipon, nagapreparar sang pagkaon, nagahatagay sang regalo kag nagakasadya.
With a report from Bombo Sunnie Mae Batencila
