Posible nga magadabong ang ekonomiya sang Pilipinas sa 6 percent sa second quarter sang tuig, suno sa isa ka ekonomista.
Ginpahayag ni Rizal Commercial Banking Corporation chief economist Michael Ricafort nga ang drivers sang pagdabong ang ginakalakipan sang mas mataas nga paggastos sang mga consumer kag gobyerno.
Suno diri, ang mas madasig nga paggastos sang gobyerno ang ginpangunahan sang padayon nga pagdabong sa infrastructure spending, subong man sang mga preparasyon para sa May 2025 midterm elections bangud ginapadali sang mga ahensiya sang gobyerno ang pagpatuman sang mga proyekto ukon programa antes ang election ban.
Ang official second quarter Philippine economic growth data ang ipaguwa sang Philippine Statistics Authority (PSA) sa masunod nga semana.
Sa first quarter sang tuig, ang ekonomiya sang Pilipinas ang nagdabong sang 5.7 percent.
Suno kay Ricafort, ang pagdabong sang ekonomiya sang pungsod malapit sa 6 percent levels ang mahimo nga masustiner sa mga masunod nga quarters bangud sa manami nga demographics kag padayon nga pagbangon sang pila ka industriya kasubong sang turismo.
Ang iban pa suno diri nga drivers sang pa-umwad amo ang padayon nga pagsanyog sa business process outsourcing (BPO) nga nakakolekta sang masobra USD35 billion sadtong 2023 kag ginalauman nga magadabong pa sa USD39 billion sa 2024 kag mas mataas pa sa mga palaabuton nga tuig.
