MANILA —Nagdangop sa Supreme Court ang election lawyer nga si Romulo Macalintal kag nagapangayo sang temporary restraining order ukon TRO batok sa bag-o nga layi nga nag-postpone sang Barangay kag Sangguniang Kabataan Elections ukon BSKE tubtob Nobyembre 2028.
Gin-file ni Macalintal sang Domingo sang gab-i ang petition para sa certiorari kag prohibition, upod ang prayer para sa TRO, batok sa Republic Act No. 12326 ukon ang legal provision nga nagtukod sang lima ka tuig nga termino sang mga barangay kag SK officials.
Ginkwestyon ni Macalintal ang gilayon nga pagpatuman sang balaod kag ang tatlo ka tuig nga extension sa termino sang mga incumbent barangay kag SK officials. Suno sa iya, kinahanglan may mabug-at ukon compelling reason antes ipostpone ang isa ka eleksyon.
Samtang, ginpahayag ni Presidente Ferdinand Marcos Jr. nga ginpirmahan niya ang RA 12326 agud mahatagan sang dugang nga tion ang mga incumbent officials nga mapauswag ang serbisyo, tapuson ang mga nasugdan nga programa kag mas tutukan ang kinahanglanon sang ila mga komunidad.
Sa pihak nga bahin, ginpahayag sang Commission on Elections ukon Comelec nga padayon nila nga sundon ang yara sa balaod tubtob wala sang mando ang Supreme Court nga magpahunong sa postponement. Ginkansela na sang Comelec ang mga aktibidad para sa 2026 BSKE, lakip ang filing sang Certificates of Candidacy.
Suno sa Comelec, nag-gasto na ini sang P8 bilyon para sa orihinal nga November 2026 BSKE, samtang ang nabilin nga P11 bilyon nga budget para sa eleksyon igagamit na sa preparasyon sang 2028 national kag local elections.
