Election watchlist areas sa Capiz naglab-ot sa 37

ROXAS CITY – Naglab-ot sa 37 barangay sa kabuuang 473 nGa barangay sa probinsiya sang Capiz ang kalakip sa election watchlist areas (EWAS).
Sa interview sang Bombo Radyo Roxas kay Capiz Police Provincial Office (CPPO) Information Officer SPO3 Donna Asmod, ginpahayag sini nga ba-se ang nasambit nga numero sa ginpatigayon nga validation.
May tatlo ka mga kategorya ang mga barangay nga kalakip sa EWAS ba-se sa parameter nga ginpaguwa sang Police Regional office 6.
Duha ka barangay sa banwa sang CUartero kag Pontevedra kag tig isa naman sa banwa sang Dumarao, President Roxas, Sapian kag Roxas City ang kalakip sa category 1, sa diin ginakabig ang nasambit nga mga lugar nga may mainit nga political rivalry ukon may election related incident sang nagligad nga eleksyon.
Yara sa idalum sang Category 2 o ang mga lugar nga may presensiya sang mga rebelde ang 16 ka barangay sa banwa sang Tapaz, anum sa Maayon, tatlo sa Cuartero kag tig isa sa Dumarao kag Pontevedra samtang isa ka barangay sa banwa sang Cuartero ang kalakip sa category 3 ukon may intense political rivalry kag presensiya sang mga rebelde.
Sa karon ginatutukan sang mga otoridad ang nasambit nga mga barangay para mangin matalunsay ang Barangay at SK election sa maabot nga Mayo 14, 2018.