ROXAS CITY – Wala madayon ang gintalana nga eleksyon, agud kun tani islan ang Presidente sang Senior Citizen nga si Meliton Arapan sa Barangay Cogon bangud duha lamang ang nagpanindugan sa pihak nga masobra 50 ang napirma sa amu nga petisyon.
Sa interview sang Bombo Radyo kay Mr. Henry Apruebo Federation of Senior Citizens Associations of the Philippines Inc. Capiz (FISCAP) President sang Roxas City Chapter, ginpahayag sini nga matapos makabaton sang una nga petisyon gilayon nila nga ginpadulungan ang lugar apang ginklaro sini nga barangay wala sang eleksyon nga natabo kundi isa lamang ka senior citizen assembly meeting.
Suno kay Apruebo, kaungdan sang una nga petisyon ang pahayag sang pila ka mga katigulangan nga wala na sila sang salig sa ila presidente kag kakulangan sa mga dokumento nga ginapresentar, ang pila sa ila nga mga rason kun ngaman luyag nila nga papanaugon sa pwesto si Arapan.
Apang, palamangkutanon sa karun nga makaligad lamang ang pila ka adlaw liwat naman nga nakabaton sang ika-duha nga petisyon si Apruebo angut sa gihapon sa luyag sang pila ka mga katigulangan.
Bangud sini, ginkuha sang FISCAP President ang boto sang may mga luyag nga maghiwat sa liwat sang eleksyon kag kung sin-o ang may disgust.
Sa ginpatigayon nga pagpiniliay, 2 lamang diri ang nagbayaw sang ila mga kamot nga nagapahayag luyag nila nga islan si Arapan rason nga wala madayon ang eleksyon bangud indi sang majurity.
Ginkatingala man sini, bangud ang papeles nga ginpasa sa iya talatapan naglab-ot na sa 60 ang nagboto nga luyag islan ang nagapungko nga presidente apang sa ginpatigayon nga piniliay duha lamang sa mga ini ang nagbayaw sang ila mga kamot.
Ginpahayag man ni Apruebo nga nakapoy na ini sa pagbalik-balik sa lugar agud kun tani limpyuhon ang nasambit nga isyu.
Sa karun, padayon pa ang ila pagtipon sang pila ka mga impormasyon agud matumod kun anu gid bala ang matuod nga sitwasyon.
