Ginreport sang Philippine Embassy sa Yangon, Myanmar kag Thailand nga wala sang Pinoy nga napilasan sa magnitude 7.7 nga linog nga nag-igo sa Myanmar nga nabatyagan man sa Bangkok, Thailand.
Suno sa Embassy sang Yangon, maid-id nila nga ginbantayan ang hitabo kag base sa mga report wala sang may napilasan ukon casualty nga nareport gikan sa ginabanta 811 ka rehistrado nga mga Pilipino nga nagapuyo kag nagatrabaho sa Myanmar.
Base naman sa Embahada ng Pilipinas sa Thailand, wala pa sila sang may nabaton nga report nga may mga Pinoy nga napilasan ukon naapektuhan sa mabaskog nga linog.
Sa pihak sini, nagapanugyan ang Embahada sa mga Pinoy sa Thailand nga magpabilin nga kalmado kag alerto subong man magmonitor sang mga updates gikan sa masaligan kag kumpirmado nga sources sang impormasyon.
Sini nga Biyernes sang hapon, nagluntad ang 7.7 magnitude nga linog sa kadalumon nga 10 kilometros nga ginsundan sang aftershock sang amo man nga magnitude suno sa US Geological Survey (USGS).
Ang epicenter sang linog ang 17.2 km gikan sa ikaduha nga pinakadako nga syudad sang Myanmar nga Mandalay nga may 1.5 million ka pumuluyo.
