PANAY, CAPIZ- Gin-umpisahan na kahapon nga adlaw, Nobyembre 25, 2025 ang pagpanagtag sang Emergency Cash Transfer para sa mga naapektuhan sang bagyo nga mga pumuluyo sang banwa sang Panay, Capiz.
Sa interview sang Bombo Radyo kay Mayor Sonny Besa sang nasambit nga banwa, iya ginpahayag nga natigayon na kahapon nga adlaw ang promisa sini nga tingub nga pagpanagtag sang amo nga emergency cash transfer.
Suno kay Besa, nakabaton kahapon nga adlaw ang kabug-usan 4, 846 ka mga pamilya nagikan sa mga kabarangayan sang Butacal, Navitas, Jamul-awon, Lat-asan, Buntod, Pawa, Agojo, Tanza Norte, Pili, Ilamnay, Linateran kag Bato sa diin ginpanagtag sa magkatuhay nga bahin sa Ernesto Sicad National High School, Barangay Pawa kag Civic Center sang banwa.
Pahayag niya, sa una nga datos nga ila ginpasa, may kabug-usan nga 17,002 ka mga pamilya ang apektado sa diin nga ginpondohan ini sang mas ukon menos P85 million pesos, apang natukiban nga may yara sang nagdoble sa listahan kag pagakakson ini.
Nahibaluan nga magapanagtag naman subong nga adlaw sang Emergency Cash Transfer sa Calapawan Gym, Tico Gym kag Civic Center. Ang pagpangatag sang nasambit nga ayuda ang magalawig tubtob sa Sabado. Mahimo nga makabaton sang P10,000 ang severely affected kag P5,000 naman sa slightly affected.
Nagapanawagan naman ang natungdan sa mga pumuluyo nga gamiton kuntani nila ang ila nabaton nga ayuda para sa kinahanglanon sang pamilya kag indi sa iban nga mga butang.
Interviewed by Bombo Francis Biñas
