Nagpatigayon sang emergency meeting ang local government bilang kabahin sang preparasyon para sa pagsaulog sang Kapyestahan ni San Juan de Bautista sa Barangay Baybay.
Sa nasambit nga meeting, gintalakay ang nagkalainlain nga precautionary measures kag safety protocols agud masiguro ang kaluwasan sang publiko, ilabi na sa pagpatigayon sang fluvial procession nga pagatambungan sang mga deboto kag mangingisda.
Suno sa mga opisyal, ginahingyo ang tanan nga partisipante nga magsunod sa mga ginpatuman nga patakaran agud malikawan ang bisan ano nga insidente sa tion sang selebrasyon.
Preparado naman ang mga personnel sang City/Municipal Disaster Risk Reduction and Management Office ukon CDRRMO, Philippine National Police ukon PNP, Philippine Coast Guard kag mga rescue volunteers nga ideploy sa mga baybayon kag kadagatan para magpatrolya kag magbantay sa kaluwasan sang mga nagatambong sa pyesta.
Ginpahayag man sang mga otoridad nga magapabilin sila nga alerto sa bug-os nga tion sang aktibidad agud masiguro nga malinong kag luwas ang pagselebrar sang kapyestahan ni San Juan de Bautista sa Barangay Baybay.
