Nagpanguna ang Filipino American Olympian nga si Emma Malabuyo sa US National Collegiate Athletic Association (NCAA) season kung sa diin nagpakita sang iya abilidad para sa University of California, Los Angeles (UCLA) Bruins.
Ginpatigayon ang nasambit nga sports events sa Big Ten Conference women’s gymnastics showdown batuk sa Michigan State Spartans kag ginkilala nga kampeon sa balance beam kung sa diin meet-winning average score nga 9.925.
Ang performance ni Malabuyo sa beam indi matupungan.
Mahibaluan nga sa katapusan nga rotation floor nakakuha ini sang 9.95 nga nagpagkit sang kadalag-an sang UCLA sa meet.
Kaupod ni Malabuyo sa kumpetisyon sanday Olympic gold medalist Jordan Chiles kag teammate Chae Campbell nga parehas nakakuha naman sang perfect 10.0.
Samtang sa post sang B1G Gymnastics makit-an sa video ang flawless routine ni Malabuyo sa beam, nga nagpalab-ot naman sang kadayawan sa dalagita kag may caption nga, ”Practice makes perfect for (Emma Malabuyo) & (UCLA Gymnastics) on beam.”
Bangud sa kadalag-an, nagsaka na si Malabuyo sa ika-4 nga ranggo sa 2025 NCAA balance beam rankings, nga nagpabakod pa sa iya status bilang isa sa mga nagapanguna nga gymnasts sa Pilipinas.
Matandaan nga si Malabuyo ang labing una nga
Filipino American gymnastics team sa 2024 Paris Olympics nga nagmarka sang isa ka makasaysayan nga milestone bilang una nga nagtindog para sa Pilipinas sa women’s artistic gymnastics sa sulod sang 60 tuig.
