Patay ang empleyado sang Department of Public Works and Highways (DPWH) Capiz 2nd Engineering District matapos na-trap sa nasunog nga balay sa Barangay Poblacion, Dumalag, Capiz.
Ginkilala ang biktima nga si Eddiemart Alba Alyas Ating 43-anyos sang nasambit nga lugar.
Sa interview sang Bombo Radyo Roxas kay FO1 Arvin Ebron, arson investigator sang Dumalag Fire Station, nagsugod ang sunog 1:58 sang kaaganhon sa tatlo ka mga bahay nga yara sa isa ka compound.
Totally burned ang balay nanday Tito Fecundo, Alicia Fecundo kag biktima nga si Edimart Alba.
Magluwas diri, partially burned man ang duha ka balay sa atubang sang nasunog nga mga balay kag ang tatlo ka mga motorsiklo.
Nagaguha sa imbestigasyon sang Bureau of Fire Protection nga nagsugod ang kalayo sa balay sang biktima nga ginapatihan natulugan bangud nakainum samtang gina-init ang iya nga sud-an.
Madasig nga naglapta ang kalayo sa kaingud balay ni Alba bangud sa mabaskog nga huyop sang hangin.
Suno naman kay Wilfredo Diocera, nakasaksi sa sunog, daku na ang kalayo sang makabugtaw sila gani ila ginpukaw ang yara sa sulod sang nagakalayo nga balay.
Nakaguha sa balay ang iban nga naga-estar sa nasunog nga balay, apang wala nakaluwas si Alba nga na-trap sa guha sang CR sang iya balay.
Nahibaluan nga himo sa mixed materials ang tatlo ka mga balay nga ginapanag-iyahan sang pamilya Fecundo.
Samtang nagaguha sa inisyal nga imbestigasyon sang Bureau Fire Protection nga nagalab-ot sa P300,000 ang nangin kahalitan sang nasambit nga sunog.
Sa karon yara na sa punerarya ang bangkay ni Alba samtang temporaryo nga nagatenir sa ila mga himata ang pamilya ni Alicia nga nakaluwas sa sunog.
