ROXAS CITY – Nagpositibo sa COVID19 rapid test ang isa ka empleyado sang National Agency nga naka-assign sa probinsya sang Capiz.
Ini ang ginpahayag ni Capiz Governor Esteban Evan “Nonoy” Contreras matapos nga naguwa ang resulta sang ginpatigayon nga rapid test.
Ang nasambit nga indibidwal ang residente sang Iloilo City.
Nahibaluan nga nakabatyag sang pila ka mga sintomas sang nasambit nga balatian ang nasambit nga pasyente sa diin ginpaidalom naman ini sa swab test.
Padayon naman nga ginamonitor sang Capiz Provincial Health Office ang amo nga pasyente kag ginahulat na lamang ang resulta sang iya nga Real Time-Polymerase Chain Reaction Test ukon RT-PCR Test para sa kumpirmasyon.
Sa karon, nagapabilin na ini sa ospital kag padayon nga ginabulong.
Samtang, padayon naman nga ginapatigayon sang mga health authorities ang contact tracing sa mga indibidwal nga nakasugata ukon nakaupod sang nasambit nga pasyente.
