ROXAS CITY – Nagpa-utwas sang iya kalian sang buot, ang isa sa tatlo ka mga empleyado nga ginapahayag ginterminate sang ila Human Resources Officer nga si Mr. Jose Vicente Bidiones IV sang munisipyo sang Sigma.
Sa interview sang Bombo Radyo kay Mr. Louie De Pedro, ginpahayag sini nga dako ang ila kakibot matapos nga nakabaton sang sulat sa diin kaungdan sini nga terminate na sila sa ila tagsa ka mga trabaho.
Magluwas kay De Pedro may duha pa ka mga Job Order employee, ang ginterminate nga amu sanday Michael Estepano kag Joel Berino.
Suno kay De Pedro, isa sa mga rason nga ila nabatian kun ngaman ginterminate sila ginapahayag nga magapadalagan bilang barangay council sa ila lugar.
Apang ginklaro sini nga wala pa sila naka-file sang certificate of candidacy, kag wala pa sang kasiguraduhan nga mapadalagan sila sa palaabuton nga eleksyon kag kun tani suno diri ginpatawag sila sa opisina kag gin-istorya.
Mahibalaun nga masobra 5 na ka tuig nga nagatrabaho si De Pedro sa ila munisipyo kag subong lamang ini natabo.
Nahibaluan man niya suno diri nga bilang isa ka job order nagatakop ang ila kontrata kada 3 ka bulan apang, palamangkutanon sa gihapon para sa ila bangud ginpadal-an na sila sang sulat sang Hulyo 2 kun sa diin magatakop kun tani ang ila kontrata Hunyo 30.
Pahayag ni De Pedro nga wala sila sang may nakita nga pirma sang ila alkalde sa amu nga sulat.
Sa karun luyag lamang sang mga ini nga maklaruhan kun anu ang matuod nga rason kun ngaman kinahanglan nga i-terminate sila sa ila mga trabaho.
