ROXAS CITY -Patay ang 54-anyos nga empleyado sang Metro Roxas Water District matapos nga nakabunggo sang naka park nga truck sa National Highway sang Barangay Bolo, Roxas City.
Ginkilala ang napatay nga si Rogelio Deviente residente sang Barangay Liong, sining siyudad.
Sandig sa inisyal nga imbestigasyon sang Traffic Section sang Roxas City Police Station nagaguwa nga samtang ginasubay sang biktima ang dalan sakay sa iya nga ginamaneho nga tricycle kag mapadulong kuntani sa Baranay Lanot sining siyudad sang aksidente sini nga masideswipe ang likod nga goma sang nakapark nga truck sa dalan nga wala sang driver.
Ginapahayag nga sa tuman ka baskog sang impact, natumba ang tricycle sa dalan kun sa diin nakaangkon sang patal nga pilas sa ulo ang biktima nga gintunaan sang iya nga pagkalipong.
Gintinguhaan pa nga makahatagan ini sang first aide sang mga katapo sang Bureau of Fire Protection (BFP) Roxas City Fire Station antes gindala sa isa pribado nga ospital kun sa diin ginbawian ini sang kabuhi samtang ginabulong sa amo nga ospital.
Samtang yara sa kustodiya sang mga opisyales sang Barangay Bolo ang tricycle sang biktima.
Mahibaluan nga wala sang may ginbutang nga early warning devices ang naka park nga truck.
