ROXAS CITY – Patay ang empleyado sang Municipal Engineer’s Office sa banwa sang President Roxas, Capiz matapos aksidente nga mabungguan kag magsuhot sa Roro bus liner nga may body number 8889 kag plate number TOV 844 nga may biyahe Carles-Estancia – Alabang vice versa sa Barangay Vizcaya, President Roxas, Capiz.
Nag-angkon sang patal nga pilas sa ulo kag lawas ang biktima nga si Willy Villariña alyas Oca sang Pantalan, Vizcaya, President Roxas nga gindeklara nga dead on arrival sa ospital.
Sa interview sang Bombo Radyo kay Christopher Bilaong sang San Dionisio, Iloilo kag konduktor sang bus, ginpahayag sini nga nagapadulong pa lamang sila sa ginluntaran sang aksidente nagbusina na ang driver sang Roro nga si Bonifacio.
Apang wala nila ginalauman ang pagguwa sang motorsiklo sang biktima sa kalsada sa diin magaagi ang bus.
Gintingwaan pa sang bus driver nga likawan ang biktima, apang nabungguan sa gihapon ini kag nagsuhot sa idalum sang RORO bus.
Samtang nahulog sa kanal ang bus kasunod ang pagbunggo sa lubi nga nautod kag kahoy nga mahogany bangud sa mabaskog nga impact.
Maswerte naman nga wala sang napilasan nga mga pasahero sa insedente.
Samtang yara na sa kostodiya sang President Roxas PNP ang driver sang Roro bus nga gilayon nagsungka matapos ang aksidente.
