MANILA, Philippines – Arestado sang National Bureau of Investigation “NBI” sa Pasay City ang isa sa ila empleyado nga ginakabig nga naggamit sang pangalan ni NBI Director Melvin Matibag sa pagpangayo sang kwarta sa mga negosyante sa Mindanao.
Suno kay Matibag, ang suspetsado isa ka job order employee sa main office sang NBI sa Pasay City nga nagapakilala bilang ahente sang bureau.
Ginapatihan nga naglibot ini sa Mindanao agud mangolekta sang kwarta nagikan sa mga indibidwal nga may wala sang husto nga rehistrado nga mga negosyo, sa baylo sang proteksyon gikan sa NBI.
Base sa inisyal nga impormasyon, naglab-ot sa balor nga P1.7 million ang ginapatihan nga nakolekta sang suspetsado pinaagi sa nasambit nga modus.
Samtang, ginpatigayon sang Organized and Transnational Crimes Division sang NBI ang entrapment operation sa isa ka restaurant sa Pasay City sang Miyerkules, Agosto 19, matapos makabaton sang reklamo nagikan sa isa ka negosyante sa Tawi-Tawi.
Lakip sa ginpangayo sang suspetsado ang P300,000 sa iya biktima para sa pag-issue sang import permit, kag dugang nga P30,000.
Pahayag sang NBI ginapahadlok sang suspetsado ang biktima nga kon indi ini maghatag sang kwarta, indi ma-isyu ang permit kag sa baylo mapasakaan sang imbestigasyon ang iya negosyo.
Bilang ibidensya sa operasyon, nakumpiskar sa suspetsado ang isa ka Colt caliber .45 pistol, samtang na aresto man sang NBI volunteer ang ginapatihan nga kaupod sa amo nga iligal nga transaksyon.
Sa karon, yara na sa kustodiya sang NBI ang duha ka persona kag ginapasakaan sang kaso nga robbery-extortion kag usurpation of authority, samtang ang NBI employee naga-atubang man sa kaso may kaangtanan sa illegal possession of firearms.
