ROXAS CITY – Pagalagson sang Social Security System (SSS) ang mga employer ukon tag-iya sang establisiyemento nga wala nagahulog sang regular nga contribution sang ila tinawo, pinaagi sa programa sang ahensya nga Run After Contributions Evaders (RACE).
Sa interview sang Bombo Radyo kay Mr. Angelo Blancaver, vice president for SSS Western Visayas II, ginpahayag sini nga nagapadulong sila sa mga establisiyimento agud tsekyaron kag ipaalinton sa mga tag-iya nga dapat maghulog sang contribution sang ila empleyado.
Klaro suno diri sa layi nga sa sulod sang 30 diyas sumugod sang nagtrabaho ang isa ka tawo, responsibiidad sang isa ka Amo ukon employer nga kaltasan ang suweldo sang trabahante para sa iya SSS contribution.
Wala man suno diri sang minimum nga numero sa tinawo agud maobligar ang employer nga maghulog sang contribution, nagakahulugan nga bisan isa lang ginapaswelduhan sini, dapat may yara sang SSS benefits ang tawo.
Dugang pa ni Blancaver nga madamo sang maangkon nga benepisyo ang SSS member, kaangay sa pag-avail sang calamity ukon salary loan, maternity, sickness, disability, retirement, funeral, death kag unemployment benefits.
Sa tion nga ireklamo ang employer sa indi paghulog sang insakto nga contribution, mahimo nga padal-an ini sang show cause order sang SSS kag may posibilidad nga mapasara ang negosyo.
Sa mga luyag magreklamo, kinahanglan nga may dokumento ang empleyado nga pamatuod nga wala ini ginahulogan sa SSS, antes magpadulong sa talatapan sang ahensya.
