ROXAS CITY – Nagdugay sa masobra lima ka minutos ang pagbayluhanay sang lupok sa engkwentro nga natabo sa tunga sang militar kag ginapahayag CPP-NPA sa Barangay San Antonio, banwa sang Tapaz sang tinalikdan nga Biyernes, takna alas 11:50 sang aga.
Suno kay Lt. Col. J-Jay Javines, Division Public Affairs Office Chief – 3ID Philippine Army, natabo ang engkwentro matapos nakabaton sila sang impormasyon nagikan sa isa ka residente sa nasambit nga lugar nga may mga armado nga grupo ang nagapangayo-kayo sang pagkaon kag nagapamilit nga maghatag sang butaw ukon koleksyon sa mga pumuluyo.
Gilayon man nga ginrespondehan sang mga katapo sang militar ang area sa diin nasugata nila ang yara sa masobra pulo (10) ka armado nga persona kag nagresulta sa engkwentro.
Dugang pa sini, 50 tubtob 100 metros ang kalayuon sang engkwentrohanay.
Wala man suno diri sang may napilasan sa bahin sang tropa sang militar.
Ginapahayag nga may nakit-an nga mga tinulo sang dugo sa encounter site kag withdrawal road apang wala naman sang may narekober nga nasamaran ukon napatay.
Samtang, narekober sa ginluntaran sang engkwentro ang isa ka high powered firearms nga M16 rifle.
Ginkumpirmar ni Javines nga miyembro sang Central Front Komiteng Rehiyon-Panay nga naga-operate sa banwa sang Tapaz tubtob sa boundary sang Antique ang naengkwentro sang militar.
Gapasamalat naman si Javines bangud nakit-an sini ang suporta sang mga pumuluyo sa Philippine Army.
Panugyan ni Javines sa tanan nga kun may yara sila sang impormasyon angut sa presensya sang rebelde nga grupo, ipahibalo ini gilayon sa Barangay Officials, PNP ukon sa Philippine Army.
