TAPAZ, CAPIZ – Liwat na naman nga nagluntad ang engkwentro sa ika-tatlo na nga beses sa isa lang ka semana sa tunga sang Philippine Army kag rebelde nga grupo kahapon nga adlaw sa Barangay Rixas 8, Tapaz, Capiz.
Sa interview sang Bombo Radyo Roxas kay Col. Erwin Rommel Lamzon, spokesperson sang 3rd Infantry Division (3ID), iya ginpahayag nga ang 61st Infantry Battalion ang naka engkwentro sang dismantled nga Central Front kag Regional Sentro de Grabidad, Komiteng Rehiyon–Panay (KR-P).
Suno kay Lamzon, tatlo ka battalion ang ginpadala sa operasyon kag nagalapta sa tri-boundary area sang Tapaz agud ma-corner ang ginatudlo nga mga high value individual ukon HVI sang New People’s Army nga indi magpadakop kag nagapadayon sa pagpakatig-a nga indi mag-surrender upod ang nabilin nila nga mga miyembro.
Ginkumpirma ni Col. Lamzon nga may yara sang napatay sa bahin sang NPA matapos nga nakit-an ang mga kagamitan kag armas sa lugar, kag base man sa impormasyon gikan sa mga pumuluyo nga may yara sang ginatuwangan sa duyan ang Communist Terrorist Group (CTG) samtang ini sila ang nagapalagyo.
Padayon naman ang ginahimo nga hot pursuit operation sang militar batok sa mga nabilin nga miyembro sang amo nga rebelde nga grupo.
Nagpanugyan ang militar sang kooperasyon sa mga pumuluyo sa lugar agud malikawan na ang engkwentro sa nasambit nga banwa.
Nahibaluan nga may engkwentro man nga natabo sang Agosto 22 sa diin isa ang pilason nga katapo sang militar kag liwat ini nga ginsundan sang Agosto 25 sa diin isa naman ka soldado ang napatay kag may isa nga pilason.
Interviewed by: Bombo Francis Biñas
