ROXAS CITY – Aminado ang hepe sang construction section sang Department of Public Works and Highways (DPWH) Capiz 1st Engineering District nga nag-isyu gid man sang Notice to Proceed ang ahensiya sa kontraktor sang proyekto sa ginakaayo nga dalan sa San Roque St., sining syudad.
Apang ginklaro ni Engr. Julius Abela nga ang ginapatuhuyan sang nasambit nga notisya amo ang pre-construction activity kag indi ang pagsugod sang nasambit nga proyekto.
Diri pa lamang may nakomiter na nga kapaltahan ang kontraktor bangud sa kapaslawan nga magpakig-angut sa gindesignar nga project engineer sang proyekto.
Bangud diri, personal nga gintsekyar sang pamunuan sang DPWH Capiz 1st Engineering District ang lugar kag gilayon ginmandu ang temporaryo nga pagpauntat sang reconstruction sang dalan tobtob ma-comply ang pre-requisite kag ma-sumiter ang nagakaigo nga documentary requirements para mapadayon ang nasambit nga proyekto.
