ROXAS CITY – Ginkumpirma sang hepe sang Provincial Engineer’s Office (PEO) nga ila na nasumiter sa mga katapu sang provincial board ang resulta sang ginpatigayon nga validation sa mga ginakwestyon nga proyekto sa idalum sang 20% development fund.
Ginpahayag ni Engineer Edgar Agana nga nagpadulong sila sa kabaranggayan sa diin nahamtang ang ginakwestyon nga proyekto sang mga board members nga ila ginaalegar may duplication.
Sa kagustuhan sang mga board members nga mangin specific ang lugar nga pahamtangan sang proyekto, gin-indicate ini sa dokumento nga gikan sa natungdan nga Sitio ukon barangay.
Aminado man si Agana nga pila lamang ka mga alkalde sa kabanwahanan ang ila napadulungan para magcourtesy call, bangud indi tanan ang bukas sa pagbaton sang mga proyekto gikan kay Governor Esteban Evan Contreras II.
Apang ang importante suno sa opisyal nga ila na-imporma ang mga barangay kapitan.
Ginpasiguro pa ni Agana nga indi man ma-implementar ang proyekto kun wala sang deed of donation ang duta nga patindugan sini.
Handa man ang inhenyero nga magtambong pananglitan nga ipatawag sa hinun-anon sang provincial board, agud maghatag kasanagan sa pila ka isyu, apang bangud yara ini sa idalum sang executive department, kinahanglan sini sang approval gikan sa gobernador.
Samtang ginpanindugan sini nga wala sang matabo nga pagsungguranay sa ila sang gobernador, bangud nagatan-aw ini sang utang nga kabalaslan sa pamilya Contreras.
