ROXAS CITY – Gindeklarar karon nga ‘persona non grata’ ang district engineer sang Department of Public Works and Highways (DPWH) Capiz 2nd Engineering District nga si Engr. Dene Baldonado sa banwa sang Tapaz.
Ini ang ginkompirmar mismo ni Tapaz Mayor Roberto ‘Nonong’ Palomar sang mainterview sang Bombo Radyo.
Suno kay Palomar, bilang district engineer sang segundo-distrito, wala sang maayo nga proyekto nga nahatag si Baldonado sa nasambit nga banwa.
Ginpahayag sang alkalde nga sadtong tuig 2018, gintinguhaan sini nga makapangayo sang mga proyekto sa presidente nga gilayon man ginpaboran ilabi na ang pagpatukod sang farm to market road sa nasambit nga banwa.
Apang ginkatingala ni Palomar nga wala na-materialize ang 1.2 bilyones pesos nga balor sang proyekto.
Ini apisar nga nasaad pa sa Executive Order 70 nga mangin top-priority dapat ang Tapaz sandig sa programa nga End Local Communist And Conflict (ELCAC).
Ang pagpatukod sang farm to market road kuntani suno kay Palomar ang makabulig agud makatigbawas sa kapigaduhon ang mga pumuluyo sang banwa kag matapna ang konflikto sa tunga sang militar kag rebelde nga grupo sa ila lugar.
Ginkatingala ni Palomar nga nadula ang nasambit nga proyekto para sa banwa apisar nga kumpleto man ini sa program of works kag na-survey sang husto.
Sa iya pag-usisa kay Baldonado, napaslawan man ini nga makahatag sang pat-od nga rason sa pagdula sa proyekto.
Ang pondo nga para kuntani sa Tapaz suno kay Palomar ang nagkadto sa banwa sang Dumalag kun sa diin ang 200 milyones pesos ang para sa pagpatindog sang public market kag ang 250 milyones pesos ang para naman sa pagpatindog sang municipal hall.
Gindugang pa ni Palomar nga ang pagpatukod sang public market kag municipal hall ang wala malakip sa function sang DPWH bangud sandig sa ila mandatu amo ang pagpahimo sang national roads, bridges ukon tulay kag mga flood-controls.
Ginpanindugang man ni Palomar nga sa kadugayon ni Baldonado bilang district engineer sa 2nd district, wala siya sang maayo nga nahatag sa Tapaz bangud kun indi sang atrasado ang proyekto, wala ini maturn-over sa lokal nga gobyerno sang banwa.
