ROXAS CITY – Nagsugod na ang hugot nga pagpatuman sang enhance border restrictions sa siyudad sang Roxas kasunod sang padayon nga pagsaka sang numero sang kaso sang Coronavirus Disease ukon COVID19 sa Pilipinas.
Ini kasunod sang ginpapanaog nga Executive Order ni City Mayor Ronnie Dadivas bangud sa pamahog nga dala sang coronavirus disease (COVID-19).
Bangud diri, indi na mahimo nga makasulod sa border sang siyudad ang pila ka mga residente gikan sa mga kabanwahanan apang pahanugotan lamang ang mga ini nga makasulod sa siyudad kun may yara sang isumiter nga medical certificate ukon medical clearance gikan sa ila tagsa ka mga munisipyo nga nagasaad nga wala sang mga sintomas sang ubo, hilanat, mabudlay nga pagginhawa ukon pila ka mga sintomas sang COVID19.
Sa interview sang Bombo Radyo Roxas kay Dr. Lory Cahilog, head sang City Health Office, ginpahayag sini nga nagahatag sila sang libre nga medical clearance/certificate para sa mga empleyado sang gobyerno sang siyudad kag sa mga pigado nga mga residente magluwas lamang sa mga empleyado sang pribado nga kumpaniya.
Apang, gin-athag ni Cahilog nga may yara sang bayaran nga P50 sa sin-o man nga magapangayo sang medical clearance/certificate sa ila talatapan partikular na sa mga residente sang siyudad sang Roxas.
Para naman sa mga empleyado nga indi residente sang probinsya kag nagatrabaho diri sa siyudad mahimo man sila nga makakuha sang medical clearance/certificate sa City Health Office basta may yara lamang sila sang i-presentar nga Identification Card ukon ID.
Gin-athag man ni Cahilog sa mga magakuha sang medical clearance/certificate sa ila opisina nga Lunes tubtob Biyernes lamang ang ila operasyon humalin alas 8 sa aga tubtob alas 5 sang hapon.
Mahibaluan nga nagapadayon ang 24/7 checkpoints sang mga otoridad sa tanan nga land entries agud magpatuman sang masunod nga mga mandatory procedures sa tanan nga nagasulod nga mga indibidwal sa borders sang Capiz.
