ROXAS CITY – Ginpalawig ang enhanced community quarantine (ECQ) sa probinsiya sang Capiz.
Ini ang ginkumpirma ni Governor Esteban Evan Contreras II sang mapakig-angutan sang Bombo Radyo.
Suno sa gobernador nga ini ang nahisugtan sang mga miyembro sang Inter Agency Task Force (IATF) sa probinsiya.
Magapadayon man ang assestment sang task force sa status sang mga positive COVID-19 patients, Persons Under Investigation (PUIs), Persons Under Monitoring (PUMs) kag high risk contacts.
Ginpahayag pa sang opisyal nga posible man nga bawion na ang ECQ kun mangin negatibo na ang tanan nga mga PUI’s, apang posible nga ma-extend liwat kun padayon nga magataas ang numero kag may magpositibo pa nga mga COVID-19 patients.
Samtang paga-estoryahan pa sang task force kun pahanugutan ang mga Capizeño OFWs nga na-stranded sa Manila kag Cebu nga makapauli sa probinsiya.
Plano sang gobernador nga obligahon ang mga stranded OFWs nga makapresentar sang dokumento nga nakapaidalum na sila sang 14 day quarantine kag kinahanglan nga magpaidalum sila sang swab test agud mapamatud-an nga negatibo sila sa COVID-19.
