ROXAS CITY – Nagsugod na kahapon nga adlaw Hulyo 3, ang enrollment para sa nagahilapit nga pagbukas sang klase sa Hulyo 29, sa Capiz National High School.
Sa interview sang Bombo Radyo kay Mr. Charlie Begas Principal IV sang Capiz National High School ginpahayag sini nga sa una nga adlaw sang enrollment, naglab-ot sa masobra 1,000 nga mga estudyante ang natigayon nga ma-enroll kag magatakop ini sa Hulyo 26.
Suno kay Begas, padayon ang ila pagrepair sa mga hulot klasehan nga may mga guba, pagpangtinlo, pagpinta, kag pagpanghawan sa guha sang eskwelahan.
Para sa mga estudyante nga magapa-enroll kinahanglan lamang nga i-submit ang ila report card, magluwas sa mga Grade 7 nga kinahanglan nga mag-submit sang photocopy sang live birth kaupod ang report card.
Kinahanglan man nga magreport ang estudyante sa eskwelahan isa ka semana antes magsugod ang pormal nga klase.
Ginpalab-ot man si Begas sa mga ginikanan nga mahimo sila magpadulong sa buluthuan sumgod Hulyo 22 tubtob 27 para sa ila Brigada eskwela.
Samtang, nagalaum man ini nga magataas pa ang numero sang mga estudyante nga magapa-enroll sa amu nga buluthuan.
