ROXAS CITY – Nagpatigayon sang inspeksyon ang mga miyembro sang Environmental Task Force sa nagkalain-lain nga quarry sites sa probinsya sang Capiz agud mahibaluan kun nagasunod ang mga ini sa reglamento sang ordinansa.
Ini suno kay BM Jose Fulgencio “Pepe” Del Rosario, Chairman sang Committee on Environment sang mainterview sang Bombo Radyo.
Ginsiling sini nga kabahin siya sa environmental task force kag nag-upod siya sa pag-inspeksyon sang nakaligad nga duwa ka semana.
Suno kay Del Rosario, madamo sang ginbayular ang pila sa 62 nga nagapatigayon sang quarry operations nga ila gin-inspeksyon kag nasumiter na nila ang reports kay Gov. Castro.
Mahibaluan nga pila sa pagsulundan sang mga quarry operators ang pagpahamtang sang Material Recovery Facilty kag CCTV kag magpananom sa bahin sang ginaquarryhan ilabi na sa mga suba nga dapat 2 meters ang kalayuon sa quarry sites agud malikawan ang pagtiphag sang duta.
Ginpaathang man sang Board Member nga indi sila Anti-quarry apang luyag lamang nila nga mangin intsakto ang operasyon sang quarry, mabuligan ang pumuluyo nga apektado sang pagbaha, ilabi na nga maproteksyunan ang dunang manggad.
Handa naman siya suno diri magbulig sa mga apektado nga trabahante kag pangitaan niya ini sang pamaagi.
Samtang handa man ang gobernador nga maghatag sang special permit sa mga quarry owners kun magcomply lamang ang mga ini sang nagakaigo nga mga rekisitos.
