ROXAS CITY – Amat amat na nga mabatyagan sa Roxas City kag probinsiya sang Capiz ang epekto sang bagyo nga Urduja.
Makita ang dalagkuan nga mga balud nga nagahampas sa pangpang nga ginadunganan sang mabaskog nga huyop sang hangin.
Sa pihak nga wala sang ulan sa karon, gin-alerto sang Roxas City government ang publiko kag ginpanugyanan nga magpabilin lamang sa ila mga balay.
Samtang kanselado na ang klase sa tanan nga lebel sang eskwelahan sa Roxas City kasunod sang pag-anunsyo ni Mayor Angel Alan Celino sa Bombo Radyo.
Suno sa alkalde tinutuyo sang iya anunsyo nga mapalab-ot sa mga ginikanan kag estudyante nga prayoridad sang gobyerno ang kaluwasan sang tanan labi na nga yara sa signal number 1 ang probinsiya.
Magluwas kay Mayor Celino, nagpalab-ot man sang kanselasyon sang klase sa ila nga nasakupan nga lugar ang mga alkalde sa banwa sang President Roxas, Jamindan, Ivisan, Dumarao.
Samtang nakahanda na ang tanan nga mga disaster risk reduction and management office sa mga kabanwahanan kalakip ang response team, PNP, AFP kag BFP sa tion nga maglala ang malain nga lakat sang panahon.
