Isa ka public school sa United Kingdom ang temporaryo nga gin-suspend ang klase matapos nagdala sang granada ang isa sa mga estudyante para sa classroom activity nga “Show and Tell”.
Ang insidente natabo sa Osmaston Church of England Primary School sa Ashbourne, Derbyshire.
Sandig sa report, isa ka bata nga lalaki ang nagpaguwa sang granada nga ginapahayag naghalin pa sa panahon sang World War II samtang ginapatigayon ang nasambit nga classroom activity.
Ang “Show and Tell” isa ka classroom activity kun sa diin ginapadala ang mga estudyante sang isa ka bagay halin sa ila nga balay kag ipaathag ini sa atubang sang klase bilang kabahin sang paghanas sa paghambal kag pagpakigbahin sang personal nga experience.
Suno sa head teacher nga si Jeanette Hart, gilayon niya nga ginkuha ang granada sa kamot sang bata kag ginbutang ini sa likod sang isa ka daku nga puno sa parking lot samtang ginahulat ang pag-abot sang mga otoridad. Nakig-angut ini gilayon sa mga pulis kag nagtawag sang bomb disposal unit agud tsekyaron ang granada.
Matapos ang maid-id nga pagtsekyar gamit ang X-ray equipment, ginkumpirma sang military bomb experts nga indi na aktibo ang granada kag wala ini sang ikasarang nga maglupok. Apang gindayaw sang mga otoridad ang madasig nga aksyon sang mga manunudlo agud masiguro ang kaluwasan sang mga estudyante.
Sa report sang lokal nga pulisya sang Matlock, ila ginpanugyan nga dapat mangin mausisaon ang mga ginikanan sa mga bagay nga ginadala sang ila mga anak sa eskwelahan. Suno kay Hart, wala sang malain nga intensiyon ang bata kag wala sini nahibaluan ang katalagman nga dala sang amo nga bagay.
