Padayon nga naga-eksperyensya ang Estados Unidos sang heatwave nga nagadala sang tuman nga kainit kag mataas nga heat index sa madamo nga mga estado.
Suno kay Bombo Pinoy Gonzales, International Correspondent sa USA ,nagalab-ot sa masobra 100 degrees Fahrenheit ukon masobra 38 degrees Celsius ang temperatura sa pila ka mga lugar, nga mas nabatyagan pa gid bangud sa sobra nga humidity.
Pahayag pa niya, nagapahanumdom ang mga otoridad sa publiko nga magtinir sa sulod sang balay kon indi kinahanglan nga magguwa, mag-inom sang madamo nga tubig, kag magkadto sa cooling centers kon kinahanglanon agud malikawan ang heat exhaustion kag heat stroke.
Dugang pa niya, nakaapekto man ang heat wave sa pila ka mga festivals kag outdoor events sa Amerika, samtang padayon nga ginabantayan sang mga lokal nga panguluhan ang sitwasyon.
Samtang, padayon pa nga gina-verify sang mga otoridad kun may yara na sang napatay bangud sa sobra nga kainit sa pila ka mga estado, kag ginapabaskog naman ang pahanumdom sa publiko nga sundon ang mga health advisories samtang nagapadayon ang heatwave.
