MANILA-Nag-enter sang plea of not guilty ang Sandiganbayan para kay Senator Jinggoy Estrada matapos nga nagbalibad ang senador nga maghatag mismo sang iya plea sa plunder kag graft cases nga may kaangtanan sa alegasyon nga flood control kickback scheme.
Nag-atubang si Estrada sa Sandiganbayan Fifth Division sang Huwebes para sa iya arraignment, nga naka-crutches kag gin-updan sang mga personnel sang Bureau of Jail Management and Penology ukon BJMP.
Suno sa korte, ginapatuman sini ang Section 19(c), Rule 116 sang Revised Rules on Criminal Procedure, nga nagasiling nga kon ang akusado magbalibad sa pag-enter sang plea ukon maghatag sang conditional plea, awtomatik nga not guilty plea ang i-record para sa iya.
Antes sini, ginpamangkot ni Associate Justice Zaldy Trespeses mismo si Estrada kon ginpaathag na sang iya abogado ang sulod sang amended information kag ang mga mahimo nga resulta sini. Ginsabat ni Estrada nga nahibaluan na niya ini, samtang ang iya abogado nag-move nga i-waive ang pagbasa sang information.
Ginpahagan man sang korte ang motion sang prosecution nga i-drop si anay Public Works Secretary Manuel Bonoan bilang co-accused ni Estrada sa mga kaso. Samtang, ginpangabay sang kampo ni Bonoan nga ipagwa siya sang PNP-Criminal Investigation and Detection Group gikan sa iya hospital detention sa PNP General Hospital.
Hatagan sang Sandiganbayan sang 10 ka adlaw ang kampo ni Estrada agud maghatag sang explanation kon ngaa indi siya dapat preventively suspended. May lima ka adlaw naman ang prosecution para magsabat, antes ini isumiter sa korte para sa resolusyon.
Ginschedule sang Sandiganbayan ang preliminary conference sa Setyembre 11 para sa marking sang mga ebidensya. Ginmanduan man ang mga abogado ni Estrada nga mag-attend agud ma-set ang hearing para sa iya petition for bail.
Pagkatapos sang hearing, nagpahayag si Estrada nga iya pagagamiton ang tanan nga legal remedies nga available sa iya, suno sa laygay sang iya mga abogado.
Samtang, nahanungod sa iya kahimtangan sa lawas, ginsiling ni Estrada nga okay man siya kag yara sa iya desisyon kon magpa-surgery ukon indi sa iya wala nga tuhod, suno sa iya doktor.
