ROXAS CITY – Nagparekord sa pulisya ang isa ka 18-anyos nga estudyante matapos nga ginaalegar natuntohan sang isa ka online shopping store sa Barangay 10, Roxas City.
Ginkilala ang tagreklamo kay John Rey Bacolod sang nasambit man nga lugar.
Base sa ginpabalhag sang tagreklamo nga nag-order ini sang iPhone 10 sa isa ka online shopping store nga Pinoy Plan Republic kun sa diin ginapahayag nga makuha lamang niya ang gin-order nga cellphone sa tion nga makapadala ini sang kwarta nga P16,500 kag sa oras nga makabayad ini may yara sang igahatag nga authorization letter kag ginapahayag nga didto ihatag ang nasambit nga cellphone sa talatapan sang Globe.
Apang sang ginpadulongan na sang amo nga estudyante ang opisina sang Globe ginpanginwala sang tagdumalahan may yara sila sang koneksyon sa nasambit nga online seller.
Samtang makaligad ang pila ka mga inadlaw gintawgan naman sang nasambit nga estuyante ang amo nga online shopping store apang wala na ini nagasabat sa iya.
Bangud diri ginpakamaayo na lamang sang tagreklamo nga ipa-blotter sa pulisya ang insedente kag luyag sini nga mabawi ang iya ginpadala nga kwarta.///
