ROXAS CITY – Patay na sang nasapwan ang isa ka estudyante sa sulod sang iya nga kwarto sa banwa sang Panay, Capiz.
Base sa inisyal nga impormasyon gikan sa Panay Municipal Police Station, nakit-an na lamang sang iya nga lola ang 19 anyos nga wala na ginhingadlan nga estudyante nga babaye sa sulod sang iya nga kwarto kag wala na sang kabuhi.
Nahibaluan nga makapila ka beses na nga nagtuyo nga mag-suicide ang biktima kun sa diin ini na ang ikaapat nga bes nga gintuyo sini nga utason ang iya kaugalingon nga kabuhi.
Nagbilin pa ini sang ‘suicide note’ kun sa diin nakasulat ang mga tinaga nga nagapabutyag nga nakapoy na ini sa iya nga kabuhi.
Mahibaluan nga nagtaliwan na ang iloy sang biktima kag naga-estar na lamang ini sa iya nga lola.
Nagamit ang biktima sang strap nga ginhigot sa iya liog kag ginkabit ang kaugalingon sa bintana nga nagresulta sa iya nga pagkamatay.
