ROXAS
CITY – Patay ang 19-anyos nga estudyante matapos naghikog
sa balay sang anay nobya sa Barangay Bolo, Roxas City.
Ginkilala ang biktima nga si Gideon Alan
Guillermo sang Barangay Bolo, Roxas City, isa ka mechanical engineering student
sang Capiz State University.
Mismo ang anay kahagugma sang biktima nga si
KrishaLyn Villanueva ang nakakita sa nakabitay nga si Guillermo sa ila nga
kusina sang magpangihi ini sang kaaganhon.
Sa interview sang Bombo Radyo Roxas kay
Villanueva, ginpahayag sini nga iya ginkatingala sang pasigahon ang suga nga
may tsinelas sa kusina sa diin pagtulok sa ibabaw nagpalangurog ang bilog nga
lawas matapos nakita ang nagabitay nga ex-boyfriend.
Bangud diri nagsinggitan ini tobtob nakabugtaw
ang iya pamilya kag ila ginbuligan nga makuha sa higot nga pisi ang biktima kag
gilayon nga gindala sa ospital apang gindeklara nga dead on arrival.
Samantala gin-ako sang dalaga nga makapila ka beses na niya nga ginbulagan si Guillermo bangud
indi na sini maagwantahan ang ginahaboy
nga estorya batuk sa iya sang pamilya sang biktima, nga indi pabor sa ila nga
relasyon.
Suno pa diri nga masami man siya nga ginapahog
sang biktima nga magapanginmatay ini kun iya bulagan.
Wala ginalauman ni Villanueva nga minatud-un
sang anay karelasyon ang pamahog nga pagpanginmatay, apang aminado nga kagab-I kasubong
nga nagpamilin bilin na ini sa diin ginpalab-ot sa iya kun ano niya ini ka
palangga ang dalaga.
