ROXAS CITY – Isa ka dako nga sakit sa ulo ang isa ka 16-anyos nga estudyante matapos nga makuhaan ini sang indi lisensyado nga armas-luthang sa Sigma Public Market, Barangay Poblacion Norte, Sigma, Capiz.
Sa interview sang Bombo Radyo kay Barangay Kapitan Rolando Bonifacio sang Barangay Pagbunitan, sa amu nga banwa ginpahayag sini nga madamo na nga rekord ang amu nga estudyante kag indi lamang sa ila barangay kundi subong man sa iban nga banwa, Police Station kag mangin sa Municipal Social Welfare and Development Office (MSWD) kag lunsay mga pagpangawat ang ginareklamo batuk sa iya.
Suno kay Bonifacio, sang damlag lang may yara sang isa ka pumuluyo ang nagpalab-ot sang reklamo sa ila barangay matapos ginapahayag nadulaan ini sang kwarta sa ila puluy-an kag natam-an man nga na-aktuhan ang amu nga estudyante nga nagapaguha na sa puluy-an kag madasig ini nga nakapalagyo.
Mahibaluan nga madugay na ini nga ginapatawag sa ila barangay agud kun tani huyason apang nagalakat ini agud magpalagyo sa ila lugar.
Makapila man ka beses suno diri nga ginpatawag ang ginikanan sang amu nga solterito apang, wala ini nagasapol agud makighinun-anon.
Pahayag sang Punong Barangay nga daw kaangay ginakonsente sang iloy ang malain nga buluhaton sang iya bata.
Matandaan nga nakuha sa sling bag sang suspek, ang 1 ka unit sang cal. 38 revolver nga loaded sang 4 ka bala kag 2 ka unit sang cellphone.
Posible man suno kay Bonifacio nga may yara ini sang grupo, bangud kun kaisa nagapauli ini sa ila barangay nga may ginamaneho nga mga nagkalain-lain nga motorsiklo.
Sa karon, yara sa paghinakup sang Sigma MPS ang suspek para sa dugang nga imbestigasyon antes i-turn-over sa DSWD.
