Natukiban nga ginkuha sang estudyante nga suspek ang duha ka mga armas sa salakyan sang iya amay nga amo ang iya gingamit sa pagpangluthang sa eskwelahan sa Zamboanga City.
Ang amay sang estudyante amo ang chief sang Bureau of Customs Police sa Zamboanga.
Suno kay Bureau of Customs Commissioner Ariel Nepomuceno, ang salakyan amo ang ginagamit sang amay sa pagdul-ong sa iya anak sa eskwelahan.
Apang sang tion sang insidente, ang driver sang amay sini amo ang nagdul-ong sa estudyante.
Ang duha ka mga armas yara sa sulod sang salakyan sa diin ang isa ka service firearm ang ginapanag-iyahan sang Bureau of Customs samtang ang isa naman ang ginapanag-iyahan sang amay.
Pahayag ni Nepomuceno, siya kaupod si Department of the Interior Government (DILG) Secretary Jonvic Remulla, ang magabisita sa Zamboanga para sa dugang nga imbestigasyon.
Nahibaluan nga gin-relieve sa pwesto ang amay kasunod sang insidente.
Nagmandu naman ang Bureau of Customs sang full inventory sang mga armas nga gin-issue sang ahensya sa mga personnel.
Ginpunto ni Nepomuceno nga ang armas nga ginsalig sang gobyerno sa mga personnel ang indi dapat mangin accessible sa iban nga tawo, ilabi na sa ila mga kabataan.
