ROXAS CITY, CAPIZ – Patay ang isa ka estudyante matapos magbungguanay ang pick-up kag motorsiklo sa Brgy. Balijuagan, Roxas City.
Ang biktima amu si alyas “Ric”, 22-anyos, driver sang motorsiklo kag residente sang Barangay Cudian, Ivisan, Capiz.
Samtang, ang driver at fault naman amu si alyas “Lando”, 67-anyos, driver sang pick-up kag residente sang Barangay Dayao, Roxas City.
Sa impormasyon nga nakuha sang Bombo Radyo nagikan sa Roxas City Police Station, ginapahayag naglapaw sa linya ang pick-up nga nagikan sa banwa sang Jamindan kag padulong kuntani sa syudad sang Roxas rason nga nabungguan sini ang kasugata nga motorsiklo nga ginamaneho sang amu nga estudyante nga nagikan naman sa syudad sang Roxas kag papuli kuntani sa ila sini nga puluy-an sa Barangay Cudian, Ivisan.
Bangud sa impact sang pagkabunggo, nagtumpilak ang driver sang motorsiklo kun sa diin nag-angkon sang patal nga pilas nga gilayon naman nga ginpadapatan sang pauna nga pagbulong sang mga katapo sang Roxas City Emergency Response Team antes nga ginpadangat sa Roxas Memorial Provincial Hospital apang, gindeklarar nga ‘dead on arrival’ sang doktor nga nag-atendir. Samtang, ginpadangat naman sa isa ka pribado nga ospital sa syudad sang Roxas ang driver sang pick-up matapos nga nagreklamo ini sang pagpin-ot sang iya nga dughan kag pagtaas sang sirkulasyon sang iya nga dugo.
Sa karon, yara na sa kustodiya sang Roxas City Police Station ang nagkalasambit nga mga behikulo kag nagapadayon ang paghinun-anon sang magtimbang nga bahin angut sa nasambit nga insidente.
