Patay ang isa ka Estudyante matapos nalumos samtang nagatabok sa suba sang Sitio Tubi, Barangay Abangay, Tapaz, Capiz.
Ang biktima amo si Alyas “Toto” Grade 11 student kag residente sang Barangay Daan, Tapaz, Capiz.
Sa interview sang Bombo Radyo kay Police Major Gregg Anthony Salbang, officer-in-charge sang Tapaz Municipal Police Station, iya ginpahayag nga maligo kuntani ang biktima kaupod ang iya mga classmate sang hinali na lang ini nga nga nadanlog kag gin-anod sang mabaskog nga current sang tubig samtang nagatabok sa suba.
Suno kay salbang, base man sa pahayag sang mga kaupod sini indi kabalo maglangoy ang biktima rason nga wala ini makaluwas.
Gilayon man nga nagresponde ang mga katapo sang Tapaz PNP, Tapaz Bureau of fire protection kag Tapaz Security Force, agud nga magkasa sang Search and Rescue Operation.
Narekober naman ang bangkay sang biktima sa bulig man sang mga residente kag mga pumuluyo sang amo nga barangay.
Gindala pa ini sa Tapaz District Hospital apang gindeklara ini nga dead on arrival sang doctor.
Nagpahanumdom man ang natungdan sa publiko labi na sa mga Estudyante nga indi magtabok sa mga suba kon mabaskog ang current sang tubig agud malikawan ang kaangay nga insidente.
