Patay ang isa ka estudyante matapos nga nakabunggo ang iya nga motorsiklo sa isa ka poste sang kuryente sa Barangay Fe, Jamindan, Capiz.
Ang biktima amo si alyas Vinz, 18-anyos kag residente sang Barangay Mianay, Sigma, Capiz.
Sa impormasyon nga nakuha sang Bombo Radyo nagikan sa Jamindan Municipal Police Station, ginapahayag naglakat ang amo nga biktima halin sa balay sang iya nga lolo sa Barangay Caridad sa amo nga banwa matapos nga nagtambong sa isa ka birthday party sakay sang iya nga motosiklo agud nga magpauli sa ila nga balay.
Samtang ginasubay ang dalanon, hinali nalang ini nga nabunggo sa isa ka poste sang kuryente.
Bangud sa mabaskog nga impact sang pagkabunggo, nag-angkon sang patal nga pilas sa ulo ang biktima.
Ginpadangat pa ini sang mga katapo sang Municipal Disaster Risk Reduction and Management Council (MDRRMO) Jamindan sa Mambusao District Hospital, Mambusao, Capiz, apang gindeklara ini nga ‘dead on arrival’ sang doktor nga nag-atendir.
Nahibaluan nga sandig sa mga pahayag sang himata sang biktima, yara ini sa impluwensya sang makahulubog nga ilimnon.
